BY
30 сакавіка 2023 года Святы Айцец Папа Францішак стварыў Апостальскую Адміністратуру для католікаў візантыйскага абраду ў Беларусі і прызначыў Апостальскім Адміністратарам гэтай касцёльнай структуры Высокадастойнага архімандрыта Яна Сяргея Гаека МІС, які да гэтага часу быў Апостальскім візітатарам для гэтых вернікаў.
Пра вышэйзгаданае прызначэнне было паведамлена ў Рыме сёння, 30 сакавіка 2023 года, а 12-й гадзіне (па цэнтральнаеўрапейскім часе).
Біяграфія
Высокадастойнага архімандрыта Яна Сяргея Гаека MIC
Нарадзіўся 8 лютага 1949 года ў Лышкавіцы каля Ловіча (Польшча).
У 1963 годзе скончыў Лышкавіцкую пачатковую школу, а праз чатыры гады — ліцэй у Ловічы.
Пасля заканчэння ліцэя ўступіў у Кангрэгацыю айцоў марыянаў, прыняўшы манаскае імя Сяргей.
З 1967 па 1974 год вучыўся на тэалагічным факультэце Люблінскага каталіцкага ўніверсітэта, а потым у Папскім усходнім інстытуце ў Рыме, дзе атрымаў доктарскую ступень у 1983 годзе.
15 жніўня 1973 г. даў вечныя абяцанні ў Кангрэгацыі айцоў марыянаў, а 23 чэрвеня наступнага года (1974) атрымаў прэзбітэрскае пасвячэнне.
Пасля пасвячэння служыў у лацінскай парафіі ў Глухалазах і супрацоўнічаў з візантыйскай парафіяй у Кастамлотах (Польшча).
З 1983 па 1999 год выкладаў усходняе багаслоўе ў Экуменічным інстытуце Люблінскага каталіцкага ўніверсітэта.
У 1993 годзе Папа Ян Павел ІІ прызначыў яго Апостальскім візітатарам для каталікоў усходняга абраду ў Беларусі. У 1996 г. узведзены ў сан архімандрыта.
30 сакавіка 2023 года Папа Францішак стварыў Апостальскую Адміністратуру для католікаў усходняга абраду ў Беларусі і прызначыў архімандрыта Сяргея Гаека Апостальскім Адміністратарам гэтай структуры.
Грэка-каталіцкая парафія Маці Божай Нястомнай Дапамогі 